سندھ، پنجاب اورخیبرپختونخوا کے مختلف شہر شدید دھند کی لپیٹ میں آنے کی وجہ سے مختلف مقامات پر موٹروے کو بند کیا گیا ہے۔

خانیوال، ننکانہ سمیت دیگر علاقوں میں دھند نے ڈیرے ڈال رکھے ہیں، جبکہ ننکانہ میں دھند کے باعث موٹرسائیکل ٹریلر سے جا ٹکرائی، حادثے میں دو موٹرسائیکل سوار جاں بحق اور ایک شخص زخمی ہوگیا۔

شدید دھند کے باعث مختلف مقامات پر موٹروے کو بھی بند کردیا گیا اور موٹروے ایم ون برہان سے صوابی تک دھند کے باعث بند، ایم ٹو کو اسلام آباد سے کوٹ مومن تک بھاری ٹریفک کیلیے بند کردیا گیا۔

موٹروے ایم تھری اور ایم فور کو بھی ٹریفک کی آمدورفت کیلئے بند کردیا گیا اور دھند ختم ہوتے ہی موٹروے کو کھول دیا جائے گا۔