وزیراعلیٰ سندھ مرادعلی شاہ نے کہا ہے کہ بلاول بھٹو ہی قوم کے وزیراعظم ہیں، آئندہ سال یوم تاسیس پر بلاول بھٹو بطور وزیراعظم عوام سے خطاب کریں گے۔

وزیراعلیٰ سندھ مراد علی شاہ نے پاکستان پیپلز پارٹی کے 55ویں یومِ تاسیس کے جلسے سے خطاب میں کہا کہ ذوالفقار علی بھٹو نے 55 سال پہلے پارٹی قائم کی اور پارٹی کا نام عوام پر پاکستان پیپلز پارٹی رکھا۔

مراد علی شاہ نے کہا کہ ذوالفقار علی بھٹو کے بعد بینظیر بھٹو نےعوام کے حقوق کیلئے جدوجہد جاری رکھی، صرف پیپلز پارٹی عوام کے حقوق کیلئے جدوجہد کر رہی ہے۔

وزیراعلیٰ سندھ نے کہا کہ چیئرمین پیپلز پارٹی نے جلسے کیلئے کراچی کا انتخاب کیا، پاکستان کےعوام کیلئے وزیراعظم بلاول بھٹو ہی ہیں، انہیں ملک کا وزیراعظم بنائیں گے۔

مرادعلی شاہ کا کہنا تھا کہ آئندہ یوم تاسیس پر وزیراعظم بلاول بھٹو کارکنوں سےخطاب کریں گے، آئندہ سال بلاول کا وزیراعظم بننے کا سال ہے، ہم بلاول بھٹو کو ذوالفقار علی بھٹو، بینظیر بھٹو کی طرح ملک کو آگے لے جاتا دیکھنا چاہتے ہیں۔