رہنما پاکستان تحریک انصاف (پی ٹی آئی) شیریں مزاری نے دعویٰ کیا کہ بغیر نمبر پلیٹ گاڑیوں سے نا معلوم افراد میرے گھر کی تلاشی لینے آئے تھے۔

ایک ٹوئٹ میں شیریں مزاری نے کہا کہ رات کے 9 بجے دو کاریں میری گلی کے کنارے پر کھڑی ہوئیں جب کہ دو کاریں دوسرے سرے اور ایک سفید کار میرے گیٹ پر آئی۔

انہوں کہا کہ سب گاڑیاں نمبر پلیٹس کے بغیر تھیں، کانوں پر ڈیوائس لگائے دو نقاب پوش افراد نے گارڈ کو بتایا کہ وہ گھر چیک کرنے آئے تھے جن کا کہنا تھا کہ راستے سے صدر مملکت نے گزرنا ہے اور پھر وہ ڈرایو وے میں چلے گئے۔

پی ٹی آئی رہنما نے مزید کہا کہ صدر کے ساتھ جب رابطہ ہوا تو انھوں نے واضح طور پر اس بات کی تردید کی تاہم نا معلوم افراد سے ان کی شناخت پوچھے جانے پر وہ لوگ فرار ہوگئے۔

اس ضمن میں شیریں مزاری نے ترجمان پاک فوج سے سوال کرتے ہوئے ایک ٹوئٹ میں لکھا کہ ڈی جی آئی ایس پی آر کو بتانے کی زحمت ہے کہ یہ لوگ کون تھے اور میرے گھر کیوں آئے؟