شوبزسیلیبرٹیز سیلاب زدگان کی مدد کیلئے آگے آگئیں

زیادہ کچھ نہیں کرسکتے تو دعا ضرورکیجئے ۔

ویب ڈیسک

اپ ڈیٹ 27 اگست 2022 03:45pm

لائف اسٹائل

ملک بھرمیں بارشوں اورسیلاب کے باعث تباہ کن صورتحال میں انٹرٹینمنٹ انڈسٹری سے وابستہ شخصیات بھی متاثرین کی مدد کے لیے اٹھ کھڑے ہوئیں ۔

‘وسیلہ راہ’ نامی امدادی مہم کا آغازکرنے والی گلوکارہ اور اداکارہ حدیقہ کیانی نے فالوورز سے فنڈز وعطیات جمع کروانے کی درخواست کی۔ حدیقہ خصوصاً بلوچستان کے سیلاب متاثرین کے لیے اشیائے ضروریہ اور نقد رقم جمع کر رہی ہیں۔

انہوں نے سوشل میڈیا پرفنڈزوعطیات دینے کے خواہشمندوں کے لئے تفصیلات شیئرکیں۔

فیصل قریشی نےاس کڑے وقت میں بھی منافع خوری کرنے والوں کو آڑے ہاتھوں لیا، اداکار نے کہا کہ چند دوستوں نے یہی خیمے کچھ عرصہ قبل 7 سے 8 ہزار میں خریدے تھے جو اب 12 سے 14 ہزارمیں فروخت ہورہے ہیں۔ ہم بڑے ‘ایماندار’ لوگ ہیں۔

فرحان سعید نے بھی فالوورزسے سیلاب متاثرین کی مدد کی اپیل کرتے ہوئے کہا کہ انہیں ہماری ضرورت ہے۔

پی ٹی آئی سے سیاسی وابستگی رکھنے والے گلوکار ابرارالحق نے بھی رواں ماہ اپنے تمام میوزک کنسرٹ کی کمائی سیلاب زدگان کو دینے کا اعلان کیا۔

نیلم منیرنے موجودہ سیاسی صورت حال پرتنقید کرتے ہوئے کہا کہ ملک میں سیلاب نے تباہی مچادی،غریب افراد بے گھرہوئے، متاثرین شدید خوف وہراس کاشکار ہیں لیکن سیاسی لیڈرز اقتدار کی جنگ میں مصروف ہیں ، یہ آخرت میں کیا منہ دکھائیں گے؟۔

اولوموپولو کی پروڈیوسرکنول کھوسٹ نے بھی ناپا میں پیش کیے جانے والے اپنے تھیٹر کی آمدن بلوچستان و سندھ کے سیلاب زدگان کے لیے وقف کرنے کا اعلان کرتے ہوئے بتایا کہ 26 سے 28 اگست تک کے تمام ٹکٹوں کی فروخت سے حاصل ہونے والی رقم سیلاب زدگان کی امداد پر خرچ کی جائے گی۔

سینئراداکارایوب کھوسہ نے بھی ایک ویڈیو میں سیلاب متاثرین کی مدد کی اپیل کرتے ہوئے کہا کہ ، “ میرا بلوچستان ڈوب گیا ہے“۔

احسن خان نے سیلاب سے شدید متاثرہ سوات کا ایک ویڈیو کلپ شیئرکرتے ہوئے بتایا کہ اسی مقام پران کے ڈرامہ سیریل ’ میرے ہم نشین ’ کی شوٹنگ کی گئی تھی۔

اداکار نے لکھا کہ سیلاب کے باعث لوگوں کا کاروبارختم ہوگیا، فصلیں تباہ ہوئیں، گھربہہ گئے اور ان کے پاس مکھانے پینے کا سامان تک نہیں ہے۔

امرخان نے بھی سیلاب متاثرین کے لیے دعاگو ہوتے ہوئے کہ ہمیں ان کی مدد کے لیے آگے آنا چاہئے اوراگرزیادہ کچھ نہیں کرسکتے تو دعا ضرورکیجئے ۔