بلوچستان میں دہشت گردی کے واقعات میں شہید ہونے والے شہریوں اور سکیورٹی فورسز کے حق میں بلوچستان شہداء فورم کے زیر اہتمام اظہار یکجہتی ریلی میٹرو پولیٹن سے نکالی گئی جو مختلف شاہراہوں سے ہوتی ہوئی کوئٹہ پریس کلب کے سامنے احتجاجی مظاہرے میں تبدیل ہوگئی۔

شرکاء نے سکیورٹی فورسز کے شہید اہلکاروں اور شہداء بلوچستان کے حق میں نعرے بھی لگائے۔

فرزند شہید وطن نوابزادہ میر سراج خان رئیسانی کے بیٹے نوابزادہ میر جمال خان رئیسانی کی ہدایت پر بلوچستان شہداء فورم اور قبائلی رہنماؤں کی قیادت میں اتوار کو میٹروپولیٹن سے ایک احتجاجی ریلی نکالی گئی جو شہر کی مختلف شاہراہوں سے ہوتی ہوئی کوئٹہ پریس کلب کے سامنے پہنچی۔

شرکاء ریلی نے پاک فوج سیکورٹی اداروں کے شہید جوانوں افسروں اور دیگر شہداء بلوچستان کے حق میں نعرے بازی بھی کی۔

ریلی کے شرکاء نے مختلف نعروں سے مزین بینرز اور پاکستان کے جھنڈے بھی اٹھائے رکھے تھے۔

ریلی کے شرکاء سے خطاب کرتے ہوئے قبائلی و سیاسی رہنما میر فرید رئیسانی اور دیگر نے کہا کہ شہیدوں کی قربانیاں کسی صورت رائیگاں نہیں جائیں گی، ہم دہشتگردی کا نشانہ بننے والے شہداء کو خراج تحسین پیش کرتے ہیں۔

خاطبین کا کہنا تھا کہ ملک کے 22 کروڑ عوام پاک فوج کے شانہ بشانہ کھڑے ہیں، دہشتگردوں کو کسی صورت ان کے مذموم مقاصد میں کامیاب نہیں ہونے دیں گے، شہیدوں نے اس پاک وطن اور سبز ہلالی پرچم کی خاطر جانوں کی قربانی دی ہے۔

ریلی کے شرکاء کا کہنا تھا کہ حکمران مسنگ پرسنز کی بات کرتے ہیں ہم آپ کے ساتھ ہیں، لیکن جو دہشتگردی کا نشانہ بن گئے ہیں ان کا بھی ساتھ دیں۔

شرکاء نے کہا کہ جب بھی ہم نکلتے ہیں تو ہمیں کہا جاتا ہے کہ حملہ ہونا والا ہے، لیکن ہم دہشتگردوں سے ڈرنے والے نہیں ہیں، ہم ملکی سلامتی پر کوئی آنچ آنے نہیں دیں گے۔

آخر میں ریلی کے شرکاء پرامن طور پر منتشر ہوگئے۔