11 یوسیز میں الیکشن کا اعلان نہ کرنے پر جماعت اسلامی نے احتجاج کا دائرہ بڑھادیا، حافظ نعیم الرحمان نے آئندہ جمعہ کو شہر کی 10 مرکزی شاہراہوں پر دھرنا دینے کا اعلان کرتے ہوئے کہا کہ 17 مارچ کو بھرپور دھرنا دے کر شہر جام کردیں گے۔

جماعت اسلامی نے 11 یوسیز میں الیکشن نہ کرانے پر شہر جام کرنے کی دھمکی دے دی۔

امیر جماعت اسلامی کراچی حافظ نعیم الرحمان نے الیکشن کمیشن سندھ کے دفتر کے باہر بھرپور احتجاج کیا۔

مظاہرے سے خطاب کرتے ہوئے حافظ نعیم الرحمان نے کہا کہ ہم دھرنا بھی دیں گے اور احتجاج بھی کریں گے، عوام نے جماعت اسلامی کو مینڈیٹ دیا ہے ہم ایک ایک ووٹ کا تحفظ کریں گے، جن یوسیز میں ری کاونٹنگ کے نام پر جعل سازی کی گئی وہ جعلی نوٹیفکیشن واپس لیے جائیں۔الیکشن کمیشن ملتوی شدہ 11 یوسیز کے انتخابات کا فوری اعلان کرے۔

ان کا کہنا مزید تھا کہ حق لیکر رہیں گے۔۔ کراچی میں نوجوان اور بچوں کی تعداد ڈھائی کروڑ سے زائد ہے۔ نوجوان ہماری طاقت ہیں۔ جدوجہد کے ساتھ رائے عامہ اور زہین سازی کرنی ہے، الیکشن کمیشن کو بھی انتخابات کرانے کے لئے مجبور کرائیں گے۔

جماعت اسلامی نے بلدیاتی انتخابات کا عمل مکمل نہ کرنے کے خلاف 17 مارچ کو کراچی جام کرنے کا اعلان کرتے ہوئے الیکشن کمیشن کے سامنے جاری مظاہرہ ختم کردیا۔