سرائے عالمگیر میں بارش کے بعد پھسلن کے باعث کار نہر میں جا گری، حادثے میں 6 افراد جاں بحق ہوگئے، تمام افراد کی لاشیں نہر سے نکال لی گئیں ۔

سرائے عالمگیر میں گزشتہ رات افسوسناک حادثہ تیز طوفانی ہواؤں اور موسلادھار بارش کے باعث پیش آیا، جہاں تھانہ صدر کے علاقے سمبلی کے مقام پر بارش کے بعد پھسلن کی وجہ سے کار نہر میں جا گری، جس کے نتیجے میں 2 سالہ بچے سمیت 6 افراد نہر میں ڈوب کر جاں بحق ہو گئے۔

سرائے عالمگیر میں کار نہر میں جاگری، 6 افراد جاں بحق#AajNews #AajUpdates pic.twitter.com/jTSLlx4tA1

— Aaj News (@Aaj_Urdu) June 17, 2022

جاں بحق افراد کا تعلق ایک ہی خاندان سے ہے ، مرنے والوں میں 23 سالہ سعید، 2 سالہ سیف، 70 سالہ رشیدہ بیگم، 50 سالہ عابدہ پروین، 28 سالہ نادیہ اور 45 سالہ شاہین اختر شامل ہیں۔

حادثے کا شکار خاندان جہلم سے اپنے گاؤں کھوہار جا رہا تھا کہ بارش کے بعد ہونے والی پھسلن کی وجہ سے کار بے قابو ہو کر نہر میں جا گری۔

واقعے کی اطلاع ملتے ہی ریسکیو 1122 اور پولیس کی ٹیمیں جائے وقوعہ پر پہنچ گئیں اور کار سمیت تمام افراد کی لاشوں کو نہر سے نکال لیا جبکہ لاشوں کو ضروری قانونی کارروائی کے بعد لواحقین کے حوالے کر دیا گیا۔

وزیراعلیٰ پنجاب کا سرائے عالمگیر کے قریب کار حادثے پر افسوس کا اظہار

دوسری جانب وزیراعلیٰ پنجاب حمزہ شہباز نے سرائے عالمگیر کے قریب کار حادثے پر افسوس کا اظہار کرتے ہوئے جاں بحق افراد کے لواحقین سے دلی ہمدردی اورتعزیت کااظہار کیا ہے۔