Aaj.tv Logo

اسلام آباد: الیکشن کمیشن آف پاکستان نے پاکستان تحریک انصاف (پی ٹی آئی) کے 25 منحرف ارکان کو ڈی سیٹ کردیا۔

چیف الیکشن کمشنرسکندرسلطان راجہ کی سربراہی میں 3 رکنی کمیشن نے پنجاب اسمبلی کے 25 منحرف ارکان کی نااہلی سے متعلق درخواست پر محفوظ شدہ فیصلہ سناتے ہوئے کہا کہ منحرف ارکان پنجاب اسمبلی سے متعلق فیصلہ اتفاق رائے سے کیا گیا ہے۔

الیکشن کمیشن کے فیصلے کے مطابق پی ٹی آئی کے منحرف ارکان کیخلاف ریفرنس منظور کر لیا گیا اور یوں پی ٹی آئی کے منحرف ہونے والے 25 ارکان پنجاب اسمبلی ڈی سیٹ ہو گئے۔

واضح رہے کہ اسپیکر پنجاب اسمبلی پرویزالہٰی نے الیکشن کمیشن کو ریفرنس بھیجا تھا ، الیکشن کمیشن نے 6 مئی کو درخواست پر پہلی سماعت کی اور ریفرنس پر8 سماعتیں ہوئیں جبکہ الیکشن کمیشن نے17 مئی کو درخواست پر فیصلہ محفوظ کیا تھا۔

پی ٹی آئی کے کون کون سے منحرف اراکین ڈی سیٹ ہوئے؟

پاکستان تحریک انصاف کے ڈی سیٹ ہونے والے 25 منحرف اراکین پنجاب اسمبلی کی فہرست بھی سامنے آ گئی۔

تحریک انصاف کے جو اراکین پنجاب اسمبلی ڈی سیٹ ہوئے ان میں راجہ صغیر احمد، ملک غلام رسول سنگا، سعید اکبر خان، محمد اجمل، علیم خان، نذیر چوہان، محمد امین ذوالقرنین، ملک نعمان لنگڑیال، محمد سلمان، زوار وڑائچ، نزید احمد خان شامل ہیں۔

اس کے علاوہ فدا حسین، زہرہ بتول، محمد طاہر، عائشہ نواز، ساجدہ یوسف، ہارون عمران گل، عظمیٰ کاردار، ملک اسد، اعجاز مسیح، سبتین رضا، محسن عطا ءخان کھوسہ، میاں خالد محمود، مہر محمد اسلم اور فیصل حیات بھی ڈی سیٹ ہوگئے۔