وزیراعلی پنجاب حمزہ شہباز نے کہا ہے کہ ہٹ دھرمی اور میں نہ مانوں کا سلسلہ وفاق سے صوبے تک جاری ہے، ابھی تک ہم کابینہ نہیں بناسکے، یہ خود کش بمبار بن کر سسٹم پر گرنا چاہتا ہے۔

فیصل آباد میں میڈیا سے گفتگو کرتے ہوئے وزیراعلی پنجاب حمزہ شہباز نے کہا کہ معاملہ توشہ خانہ سے شروع ہوکر فرح گوگی تک پہنچا ہے، جو کرپشن پنجاب میں ہوئی اس کی مثال نہیں ملتی، ہم انتقام پر یقین نہیں رکھتے۔

انہوں نے کہا کہ عوام کی جیبوں پر ڈاکے کا حساب لینا ہماری ذمہ داری ہے، ہم اچھے پولیس افسران اور اچھے بیورکریٹس کو لائیں گے۔

وزیراعلی پنجاب نے کہا کہ جتنا بھی عرصہ ہے ہم تباہی کو صحیح کرنے کی کوشش کریں گے، کسی کو بھی سسٹم کو خراب کرنے کی اجازت نہیں دیں گے۔

ان کا کہنا تھا کہ عمران نیازی کی آئین دشمنی کا مقابلہ کریں گے، ہم پاکستان کو قائد اعظم کا خوشحال پاکستان بنانے کیلئے دن رات ایک کریں گے۔