کراچی کے نیشنل اسٹیڈیم میں پاک آسٹریلیا سیریز کے دوسرے ٹیسٹ میچ کے دوران شائقینِ کرکٹ نے پاکستان سمیت مہمان کھلاڑیوں کا بھی دل جیت لیا۔

میچ کے اختتام پر مہمان ٹیم کے کھلاڑیوں کی جانب سے انسٹاگرام پر پوسٹس شیئر کی گئیں جس میں ایک بات یکساں تھی اور وہ تماشائیوں کی تعریف تھی۔

ڈیوڈ وارنر نے اپنی انسٹاگرام پوسٹ میں لکھا کہ ’کراچی کے شاندار تماشائیوں کی وجہ سے پانچ دن شاندار رہے، جیت اچھی ہوتی ہے لیکن پاکستان اور کپتان بابر اعظم نے جو عزم دکھایا وہ بہت اچھا تھا، پُرامید ہیں کہ لاہور میں ٹیسٹ جیت جائیں۔‘

مارنوس لابوشین نے اپنی پوسٹ میں کہا کہ بابر اعظم نے متاثر کُن اننگز کھیلی، شکریہ کراچی۔

کپتان پیٹ کمنز نے اپنے پیغام میں لکھا کہ'کراچی میں 5 دن بہترین گزرے'۔

دوسری جانب قومی کرکٹ ٹیم کے وکٹ کیپر بیٹر محمد رضوان نے بھی کہا ہے کہ کراچی ٹیسٹ میچ بچانے کا سہرا عوام کے سر ہے، کراچی کراؤڈ نے گراؤنڈ میں ہمیں بہت ہمت دی۔