Aaj.tv Logo

فیڈر بورڈ آف ریونیو نے قومی ایرلائن پی آئی اے کے اکاؤنٹس منجمد کردیے۔

ذرائع کے مطابق ایف بی آر نے ٹکٹس پر فیڈرل ایکسائز ڈیوٹی ادا نہ کرنے پر پی آئی اےکے بینکس اکاونٹ منجمد کردیے ہیں۔

ذرائع کا کہنا ہے کہ پی آئی اے نے گذشتہ دو سال سے ٹکٹ پر وصول کی جانے والی فیڈرل ایکسائز ڈیوٹی جمع نہیں کروائی ، قومی ایئرلائن نے دو سال سے فیڈرل ایکسائز کے 4.50 ارب روپے ادا نہیں کیے ہیں۔

ایف بی آر ذرائع کے مطابق ملک بھر میں پی آئی اے کے 50 اکاونٹس منجمد کیے گئے ہیں۔

ذرائع کا مزید کہنا ہے کہ پی آئی اے کے اکاؤنٹس 4 ارب روپے ٹیکس ریکوری تک منجمد رہیں گے ۔

دوسری جانب ترجمان پی آئی اے نے ایف بی آر کے فیصلے پر افسوس کا اظہار کرتے ہوئے کہا کہ پی آئی اے کی ساکھ مجروح کرنے کی کوشش کی جا رہی ہے۔

ترجمان نے کہا کہ ایف بی آر کا یہ اقدام قومی ادارے کی بین الاقومی سطح پر ندامت کا باعث بنے گا۔