Aaj News

جمعہ, مارچ 29, 2024  
18 Ramadan 1445  

ویسٹ انڈیزکیخلاف دوسرے ٹیسٹ میں فتح پر بابر اعظم خوشی سے نہال

جمیکا:پاکستان کرکٹ ٹیم کے کپتان بابر اعظم ویسٹ انڈیز کیخلاف...
اپ ڈیٹ 25 اگست 2021 10:37am

جمیکا:پاکستان کرکٹ ٹیم کے کپتان بابر اعظم ویسٹ انڈیز کیخلاف دوسرے ٹیسٹ میں فتح پر خوشی سے نہال ہوگئے، انہوں نے کہا کہ میری اور فواد کی شراکت نے میچ بنایا،شاہین شاہ آفریدی کی بولنگ نے اہم کردار ادا کیا،ٹھان لی تھی کہ دوسرا ٹیسٹ جیتنا ہے۔

ویسٹ انڈیز کیخلاف دوسرے ٹیسٹ میچ میں کامیابی کے بعد قومی کرکٹ ٹیم کے کپتان بابر اعظم کاکہنا ہے کہ تمام کھلاڑیوں نے شاندار کھیل پیش کیا، آج کی جیت پوری ٹیم کی مشترکہ محنت کا نتیجہ ہے۔

بابر اعظم کا کہنا تھا کہ جب بھی جیت ملتی ہے بطور کپتان بہت اعتماد ملتا ہے اور خوشی ہے کہ پہلی اننگز میں جلدی وکٹیں گنوانے کے باوجود فواد عالم کے ساتھ پارٹنرشپ ہمیں میچ میں واپس لائی۔

قومی کرکٹ ٹیم کے کپتان کا کہنا تھا کہ میں ہمیشہ کہتا ہوں فواد عالم بہت تجربہ کار بیٹسمین ہیں انہوں نے مشکل کنڈیشنز میں شاندار بیٹنگ کا مظاہرہ کیا۔

بابر اعظم نےمزید کہا کہ ہمارے ہر بیٹسمین کو فواد عالم سے سیکھنے کی ضرورت ہے، ڈومیسٹک کرکٹ میں 10 ہزار رنز بنانے والے فواد عالم ٹیم کو مشکل صورتحال سے نکالنے میں اہم کردار ادا کررہے ہیں۔

کپتان بابر اعظم کاکہنا تھا کہ وکٹ سے مدد نہیں ملی تو فیلڈنگ پوزیشنز بدل کر حریف ٹیم پر دباؤ بڑھانے کا فیصلہ کیا جبکہ ہم نے حکمت عملی کے تحت ویسٹ انڈیز کو چوتھے روز20 اوورز کھیلائے۔

بابر اعظم نے کہا کہ شاہین شاہ آفریدی نے شاندار بولنگ کا مظاہرہ کیا ، نوجوان فاسٹ بولر نے اپنی عمدہ بولنگ سے میزبان ٹیم کو بیک فٹ پر ہی رکھا ،شاہین شاہ آفریدی بہت بااعتماد بولر ہیں جب بھی انہیں بولنگ کا کہتا ہوں وہ جارحانہ بولنگ کرتے ہیں ،خوشی ہے کہ ان جیسا بولر میرے پاس ہے ۔

واضح رہے کہ پاکستان نے ویسٹ انڈیز کو دوسرے ٹیسٹ میچ میں109 رنز سے شکست دیکر سیریز 1-1سے برابر کردی ہے۔

babar azam

jamaica

Pak Vs Wi

kingston

Comments are closed on this story.

تبصرے

تبولا

Taboola ads will show in this div