اسپیکر قومی اسمبلی نے قائد حزب اختلاف شہباز شریف اور بلاول بھٹو زرداری سے ٹیلیفونک رابطہ کیااورہنگامہ آرائی میں ملوث اراکین کے داخلہ پر پابندی سے آگاہ کیا۔دونوں رہنماؤں نے ایوان کے ماحول کو پر امن رکھنے کےلئے تعاون کی یقین دہانی کرائی۔

ٹیلی فونک رابطہ میں بجٹ اجلاس کے دوران ایوان کے ماحول کو سازگار رکھنے پر تبادلہ خیال کیاگیا۔

اسپیکر اسد قیصر نے کہا کہ گزشتہ روز ایوان میں پیش آنے والے ناخوشگوار واقعات قابل افسوس ہیں۔ایوان کے ماحول کو خوشگوار رکھنا حکومت اور اپوزیشن کی مشترکہ ذمہ داری ہے۔تمام پارلیمانی لیڈرز بجٹ اجلاس کے دوران ایوان کے ماحول کو خوشگوار رکھنے کےلئے کردار ادا کریں۔

انہوں نے بتایا کہ ایوان میں ہنگامہ آرائی اور غیر پارلیمانی زبان استعمال کرنے والے اراکین پر اسمبلی حدود میں داخلے پر پابندی عائد کی گئی ہے۔

قائدِ حزب اختلاف محمد شہباز شریف اور بلاول بھٹو زرداری نے اسپیکر سے اتفاق کیا۔