Aaj TV News

BR100 4,597 Increased By ▲ 11 (0.24%)
BR30 17,781 Increased By ▲ 212 (1.21%)
KSE100 45,018 Increased By ▲ 192 (0.43%)
KSE30 17,748 Increased By ▲ 82 (0.46%)
COVID-19 TOTAL DAILY
CASES 1,367,605 7,586
DEATHS 29,097 20
Sindh 523,774 Cases
Punjab 462,323 Cases
Balochistan 33,910 Cases
Islamabad 117,436 Cases
KP 184,455 Cases

احمدآباد: بھارت نے انگلینڈ کو تیسرے ٹیسٹ میں اسپن کے جال میں پھنسا کر 10 وکٹوں سے دھول چٹادی اور آئی سی سی ٹیسٹ چیمپئن شپ کے فائنل میں جگہ بنالی۔

تفصیلات کے مطابق احمدآباد کے نریندر مودی کرکٹ اسٹیڈیم میں بھارت اور انگلینڈ کے درمیان ٹیسٹ سیریز کا تیسرا میچ کھیلا گیا جو دو روز بھی نہ چل سکا۔ بھارتی ٹیم نے انگلش ٹیم کو اسپن جال میں پھنسا کر 10 وکٹوں سے دھول چٹائی اور آئی سی سی ٹیسٹ چیمپئن شپ کے فائنل کی دوڑ سے باہر کردیا۔

اس میچ کا ٹاس انگلینڈ نے جیت کر پہلے بیٹنگ کی اور ٹرننگ وکٹ پر صرف 112 رنز بناکر ڈھیر ہوگئی۔ اکشر پٹیل نے 6 شکار کئے۔ جواب میں بھارتی ٹیم بھی پہلی اننگز میں صرف 145 رنز بناسکی۔ جو روٹ 5 وکٹیں لے اُڑے۔

انگلینڈ نے 33 رنز کے خسارے کے ساتھ دوسری اننگز کا آغاز کیا تو یہ اننگز مزید تباہ کن ثابت ہوئی اور پوری انگلش ٹیم محض 81 رنز پر ڈھیر ہوگئی۔ اکشر پٹیل نے ایک بار پھر 6 کھلاڑیوں کو پویلین کی راہ دکھائی۔

اس میچ کیلئے بھارت کی جانب سے اس قدر ٹرننگ وکٹ بنائی گئی کہ 2 دن میں گرنے والی 30 میں سے 28 وکٹیں اسپنرز نے حاصل کیں۔

بھارت نے انگلینڈ کی جانب سے دیا گیا 49 رنز کا ہدف باآسانی بغیر کوئی وکٹ گنوائے حاصل کیا اور آئی سی سی ٹیسٹ چیمپئن شپ کے فائنل میں جگہ بنالی۔

اکشر پٹیل کو میچ میں 12 وکٹیں اُڑانے پر میچ کا ہیرو قرار دیا گیا۔

واضح رہے کہ رواں برس جون میں بھارتی ٹیم نیوزی لینڈ کے خلاف لارڈز کے تاریخی میدان پر فائنل میں ٹکرائے گی۔