Aaj News

برطانوی وزیراعظم نے لاک ڈاؤن میں مرحلہ وار نرمی کا اعلان کردیا

لندن :برطانوی وزیراعظم بورس جانسن نےبرطانیہ میں لاک ڈاؤن میں...
شائع 23 فروری 2021 09:58am

لندن :برطانوی وزیراعظم بورس جانسن نےبرطانیہ میں لاک ڈاؤن میں مرحلہ وار نرمی کا اعلان کردیا،8 مارچ سے اسکولز کھول دیئے جائیں گےجبکہ 21جون سے لاک ڈاؤن کی تمام پابندیاں ختم ہوجائیں گی۔

برطانوی وزیراعظم بورس جانسن نے لندن میں پارلیمنٹ میں خطاب کرتے ہوئے کہا کہ 21 جون تک لاک ڈاؤن کی تمام پابندیاں ختم کردی جائیں گی،لاک ڈاؤن 4 مرحلوں میں ختم کیا جائے گا، ہر مرحلے کے درمیان 5 ہفتوں کا وقفہ ہوگا۔ پہلا مرحلہ دو حصوں پر مشتمل ہوگا۔

برطانوی وزیراعظم نے کہا کہ 8 مارچ سے تمام اسکول کھل جائیں گے، آؤٹ ڈور کھیلوں کی اجازت ہوگی ،بعض اسکول ٹیسٹ کے انتظامات کیلئے کچھ تاخیر سے کھل سکتے ہیں،8 مارچ سے عوامی مقامات میں 2 افراد مل کر پکنک کرسکیں گے۔

بورس جانسن نے مزید کہا کہ 29 مارچ سے 2 گھرانوں کے 6 افراد گھر سے باہر اور گارڈن میں ملاقات کرسکیں گے،29 مارچ سے ٹینس، باسکٹ بال، گالف کورس اور فٹ بال گراؤنڈ کھل جائیں گے، کئیر ہومز کے ہر رہائشی کو ایک شخص سے ملاقات کی اجازت ہوگی،29 مارچ سے لوگ اپنے علاقوں سے باہر جاسکیں گے، لیکن رات گزارنے کی اجازت نہیں ہوگی۔

برطانوی وزیراعظم نے کہا کہ 12 اپریل سے دیگر دکانیں، ہیر ڈریسرز، جم، آؤٹ ڈور مہمان نوازی کا شعبہ کھلے گا۔ 12 مارچ سے مختلف گھرانوں کے افراد بئیر گارڈن میں ملاقات بھی کرسکیں گے،17 مئی سے پب ، ریسٹورنٹ اور سینما کھل جائیں گے،مرحلہ وار پابندیوں کو ختم کرنے سے قبل 4 شرائط کو لازمی پورا کرنا ہوگا، جن میں ویکسین پروگرام، اموات میں کمی، انفیکشن کی شرح اور نئے وائرس کی صورت حال شامل ہیں۔

وزیراعظم بورس جانسن نے مزیدکہا کہ حکومت باقاعدگی سے اقدامات کا جائزہ لے گی،سماجی دوری کم کرنے اور بین الاقوامی سفر کی اجازت کا جائزہ لیا جائے گا، ویلز، اسکاٹ لینڈ اور شمالی آئر لینڈ لاک ڈاؤن سےمتعلق مختلف حکمت عملی اختیار کریں گے۔

london

lockdown

Boris Johnson

Schools

UK PM

Comments are closed on this story.

مقبول ترین