Aaj TV News

COVID-19 TOTAL DAILY
CASES 324,744 667
DEATHS 6,692 19

اسلام آباد:سپریم کورٹ نے 25 ویں آئینی ترمیم کیخلاف درخواست سماعت کیلئے منظور کرلی اور وفاق ،اٹارنی جنرل سمیت تمام فریقین کو نوٹسز جاری کردیئے۔

جسٹس عمرعطا بندیال کی سربراہی میں سپریم کورٹ کے 3رکنی بینچ نے25 ویں آئینی ترمیم کیخلاف درخواست پرسماعت کی۔

جسٹس عمر عطاء بندیال نے ریمارکس دیئے کہ آپ چاہتے ہیں ہم گھڑی کوپیچھے کریں، یہ بڑا دلچسپ کیس ہے۔

درخواست گزار نے مؤقف اپنایا کہ فاٹا کا غیرآئینی طریقے سے انضمام کرتے ہوئے آئین کے آرٹیکل 247/6 کی خلاف ورزی کی گئی، قانون کے مطابق تبدیلی کرنے سے پہلے جرگے سے مشاورت ضروری تھی،جرگے سے مشاورت کے بغیرفاٹا کوکے پی میں ضم کردیا۔

جسٹس عمرعطا بندیال نے ریمارکس دیئے کہ آپ چاہتے ہیں کہ قبائلی علاقے میں تبدیلی سے پہلے جرگہ فیصلہ کرے، ہم نوٹس جاری کررہےہیں اس سے متعلق حکومت سے پوچھیں گے۔

جس پر وکیل درخواست گزار نے کہاکہ جی قانون بھی یہی کہتا ہے، ہم نے جرگے میں موجودہ ایم این اے اور ایم ایل اے بھی شامل کئے ہیں۔

سپریم کورٹ نے 25 ویں آئینی ترمیم کیخلاف درخواست سماعت کیلئے منظور کر لی۔ عدالت نے وفاق اور اٹارنی جنرل اورایڈوکیٹ جنرل کے پی کے سمیت تمام فریقین کو نوٹسز جاری کرتے ہوئے سماعت غیر معینہ مدت کیلئے ملتوی کردی۔